主場夠把炮爭開靚個頭
踢完歐聯今晚輪到歐霸8強首回合展開，重頭大戰阿仙奴主場鬥意甲拿玻里。作為參戰下屆歐聯嘅「捷徑」，歐霸不嬲被「兵工廠」視為必爭之地，雖然抽中對另一熱門拿玻里，但阿仙奴今屆歐霸主場堅勁，可望贏波打好晉級基礎，小讓平半捧阿仙奴上盤。
（myTV Gold 303、Now 643、有線616及656台周五凌晨3時直播）
阿仙奴現時仍要為英超前4而掙扎，上輪聯賽作客0比1輸畀愛華頓，令佢哋爭前4處於被動。為保住另一條直入來屆歐聯嘅「捷徑」，「兵工廠」點都唔會放棄力爭歐霸冠軍。查實阿仙奴主場同作客表現判若兩隊，聯賽連盃賽近7場主場賽事贏晒，單計今屆歐霸5次主場出擊，「兵工廠」亦豪取4勝1和，包括早前喺32強同16強次回合先後反勝巴迪同雷恩晉級。
哥斯尼可望復出鎮守後防
主隊賽前更收到好消息，後防大將兼隊長哥斯尼康復進度唔錯，有望復出夥拍希臘守將柏柏斯達夫普路斯鎮守後防，絕對可以鞏固阿仙奴偶有甩漏嘅防線。咪忘記「廠長」艾美利堪稱「歐霸專家」，有佢領軍亦係阿仙奴另一着數之處。
拿玻里今屆踢歐洲賽表現飄忽，連同歐聯近5仗歐戰作客僅得1勝，加上兩位中後場主力艾比奧爾同阿馬度迪亞華拉，今仗齊齊倦勤，防線難免有影響，造訪酋長球場可謂凶多吉少，一於捧阿仙奴上盤。