捍衞德國顏面
綜觀4場歐霸8強首回合，最唔起眼嗰場，一定係「雙鷹戰」賓菲加主場鬥法蘭克福。雖然賓菲加歐賽經驗贏晒，但法蘭克福今屆歐霸表現堅突出，加上要捍衞德國足球嘅顏面，作客出擊必打甩髀唔想再丟「日耳曼」嘅架，捧讓球客勝。
（有線604及603台周五凌晨3時直播）
射手盧卡祖域大爆發
賓菲加堪稱山寨王，喺葡超就橫行霸道，但受到「古特曼魔咒」困擾，自上世紀60年代起，再未於歐洲賽奪冠，就算經驗較豐富，亦注定只能做配角。法蘭克福名氣輸蝕，但上季捧走德國盃後，今季Keep住個勢聯賽位居前列，歐霸亦順風順水，今屆10場歐霸錄8勝2和不敗佳績，上圈更淘汰意甲勁旅國際米蘭，貨真價實。塞爾維亞射手盧卡祖域大爆發，今屆歐霸入咗7粒，仲盛傳獲巴塞隆拿招手，一定搏老命證明身價，配合去年世盃表現出色嘅克羅地亞翼鋒列比錫支援，鋒力唔講得笑。
隨住拜仁、多蒙特及利華呢幾支傳統德甲勁旅敗走歐戰，「法福」已成為「日耳曼」唯一「幸存者」，呢隻「雄鷹」要保住德國足球嘅尊嚴，難得抽中牌面差不多嘅賓菲加，作客贏埋都唔出奇，讓球客勝不容錯過。