爭前4唔放過韋斯咸
英超榜首雙雄周日晚先有比賽，今晚焦點落喺前4之爭，依家形勢最惡劣嘅「紅魔」曼聯會喺尾場迎戰「錘仔幫」韋斯咸。曼聯爭入前4絕對1分都不能少，不過佢哋今場殘陣出擊，而且「紅魔」近9場主場聯賽只有1場冇失波，隨時畀冇心理包袱嘅錘仔偷到雞，曼聯讓一球、球半唔抵玩，轉捧2.5球大盤最穩陣。
（Now 621周日凌晨零時30分直播）
今季英超之爭史無前例咁激烈，除利物浦、曼城喺榜首你追我趕，車路士、熱刺、阿仙奴及曼聯為來屆歐聯入場券亦鬥得難分難解，現時排第6位嘅曼聯失分最多，而且餘下賽程仲要硬撼曼城及車路士，就算下周中要作客巴塞隆拿應付歐聯8強次回合，今場亦冇退路一定要搏。不過曼聯今場有正選左右閘艾舒利楊格及勞基梳爾停賽，路爾斯華倫西亞、達美安亦傷愈冇耐，防線兵源告急，而且曼聯近9場主場聯賽只有1場保持清白身，面對富咸、哈特斯菲爾德、白禮頓及般尼等下游分子都有失波，今仗要淨勝2球開上盤絕對唔易。
韋斯咸冇包袱鬥攻
韋斯咸上場0比2不敵車路士，近7場作客聯賽1和6負，狀態麻麻，佢哋依家排喺聯賽榜第11位，既冇降班威脅，爭歐洲賽資格又未輪到佢哋，冇搶分壓力可放開手腳與曼聯鬥攻。論人腳韋斯咸其實唔曳，前鋒阿拿奧杜域、中場菲臘安達臣及蘭仙尼都係極具個人能力嘅技術型球員，今季崛起嘅國家隊新星迪格蘭賴斯攻守兼備，包括曼聯在內嘅多間大球會都想將佢收歸旗下，仲有「小豌豆」查維亞靴南迪斯倒戈重返奧脫福，就算球隊未能打破今季聯賽作客Big6必敗嘅定律，要喺表現欠穩嘅曼聯防線攞到入波絕非奇事，大細中位數2.5球嘅大盤咪錯過。