今晚西甲好戲連場，其中「2哥」馬德里體育會會喺主場迎戰切爾達。馬體會箭頭迪亞高哥斯達因爆粗「問候」球證同佢家人，被重罰停賽8場提早收咧，切爾達亦有神箭伊亞高艾斯巴斯坐波監，兩隊都冇晒火，捧中位數2.5球嘅入球細最正路。
（Now 632周日凌晨零時30分直播）
「迪哥」停8場提早收咧
隨着上輪榜首大戰以0比2輸畀巴塞隆拿後，馬體會已落後「地上最強」11分，依家只剩番7輪，除非巴塞忽然崩潰，否則馬體會要後上奪冠只得兩個睇法，係渺茫同冇機會，因此佢哋戰意絕對成疑。禍不單行嘅係，射手迪亞高哥斯達對巴塞時因不滿球證曼辛奴判決，居然爆粗「問候」曼辛奴同佢阿媽，「迪哥」唔單止即時領紅牌被逐，日前更被重判停賽8場，即係今季提早收咧，加上另一中鋒艾華路莫拉達亦因傷缺陣，剩番基沙文一條友撐住鋒線，料火力會大減。
另一邊廂，切爾達有前鋒伊亞高艾斯巴斯傷愈復出，佢近3仗入5粒，幫球隊取得2勝1和令護級重現曙光，可惜呢位神箭累積黃牌夠數，今仗要坐波監，令切爾達冇晒火，造訪「床單兵團」一定玩死守，希望搶得1分得1分，捧細盤最上算。
至於早少少開波嘅巴塞作客包尾大幡侯爾斯卡，由於巴塞下周中要喺歐聯8強次回合對曼聯，因此可能喺今仗進行大輪換，有傳美斯、拿傑迪錫、布斯基斯、蘇亞雷斯都唔會隨隊，不過馬爾甘及奇雲保定等副選都有一定級數，今仗可恃質贏波，客勝有計。
（Now 632周六晚10時15分直播）