德甲漢諾威主場迎戰慕遜加柏，兩軍近期戰績都差，但相比之下慕遜加柏不但人腳實力遠勝主隊，上輪賽和大勇嘅雲達不來梅，睇到狀態同士氣都有起色，今晚遇上降班膽漢諾威係反彈黃金機會，慕遜加柏讓半一要捧上盤。
（on.cc東網周六晚9時30分直播）
慕遜加柏近況令人失望，近8場德甲只係作客贏過緬恩斯1粒，其餘7戰3和4負，已經由聯賽榜次席跌到落第5位，莫講話下屆歐聯參賽資格處於被動位置，剩低6輪聯賽若冇起色，連歐霸參賽資格都有危機，會方較早前公布，同教練赫基嘅合作到季尾為止，下季會換新帥，赫基坦言對此感到唔開心，但會方已經公布解釋，換帥係為會方長遠發展着想，對赫基佢哋係唔太滿意，但仍心存感激，所以冇即時炒佢，球隊經歷連場低潮後，上輪主場對今年不敗嘅雲達不來梅表現終於重現生氣，最終雖然畀對手逼和，但狀態同鬥心都好番好多，今晚面對降班膽，有充足決心重響勝鼓。
漢諾威已為降班做準備
漢諾威可以話德甲最弱球隊，近月不停地震，球會高層經過大選換晒班，早前炒埋經理海特，現任教頭杜迪領軍後德甲成績只係1勝8負，球隊不經不覺已經7連敗，聯賽榜包尾落後尾3嘅史特加7分，會方亦已經打定輸數，講明開始為下屆喺德乙做準備，依家唔炒杜迪只係因為唔想再浪費金錢賠償畀佢，但下季佢已經唔係會方計劃之內，呢班波近期其實已經每戰必拚，可惜質庸體能差，場場搏到尾段都自動崩潰，今晚難逃8連敗厄運。