拜仁大炒多蒙特後上晒火，衝德甲7連霸勢必勇往直前搶士哥，遇上現時德甲最冇壓力同最開放嘅「超級神奇球隊」杜塞爾多夫，注定入球停不了，今場大細中位數3.5球賠率太熱，黑柴博有2.75倍嘅中位數4.5球大盤。
（on.cc東網周日晚9時30分直播）
拜仁炒完多蒙特氣勢如虹，最難得係冇歐戰負擔下，現時每周都有整整一星期備戰聯賽，球員體能同狀態都有保證，不過佢哋絕對唔會掉以輕心，上次作客弗賴堡失分已經帶畀佢哋唔少麻煩，何況首循環主場對杜塞爾多夫喺3比1領先優勢下都被逼和3比3，可見對手絕對唔易啃，今戰必會以最強火力爭取更大領先優勢，預期一開波就會圍攻主隊。
杜塞爾多夫享受開放足球
杜塞爾多夫近14場聯賽贏咗9場，既冇護級壓力又冇野心爭踢歐洲賽，可以盡情享受開放足球，陣中比利時孖寶盧克巴基奧同賓尼圖拉文，被譽為今季德甲反擊最快嘅翼鋒，前者至今喺德甲入咗8球仲有4個助攻，首循環仲成為17年來第一個作客安聯球場連中三元嘅球員；後者入咗9球同4個助攻，由於表現超班，全隊都明白下季好難留得住佢哋，所以更珍惜呢段合作日子，今晚有本錢喺主場同拜仁駁火。
不過，杜塞爾多夫今仗有前冇後，防線重心基斯素文因傷缺陣，佢今季德甲只缺席過1場，就係去年10月第8輪作客法蘭克福，結果慘輸1比7錄得球會近20年來最大敗仗，足見杜塞爾多夫冇咗佢有幾大鑊，大家今晚最好準備定花生飲品，一齊上東網欣賞呢場瘋狂入球騷啦！