今季英超冠軍爭逐異常緊湊，依家打咗33輪嘅「1哥」利物浦，比打少1場嘅曼城僅多2分，聯賽只剩下5至6輪，任何1場失分足以左右大局，到底呢對一時瑜亮，誰能稱霸英超呢？
首先，早前已捧英格蘭聯賽盃嘅曼城，唔只爭奪聯賽，仲有英格蘭足總盃及歐聯，劍指史無前例嘅「4冠王」，因此比賽場數一定比紅軍更多，體力消耗更大，如何有效地輪換，好考主帥哥迪奧拿功力。哥帥亦不忘為球員減壓，謙稱冇可能成為「4冠王」，並稱踏入4月仍能保持幾線冠軍爭逐，已非常難得，啱啱喺歐聯8強首回合輸畀熱刺0比1，嚟緊又要打次回合，「藍月亮」今晚作客水晶宮，哥帥最想「慳水慳力」下擸晒贏波3分。
至於暫時領先嘅利物浦，今晚要主場迎戰車路士，亦係紅軍今季聯賽最後1次對Big 6分子，肯定難打，而且5年前紅軍喺積分榜領先時，咁啱4月主場遭逢車仔，隊長謝拉特世紀一跣，最終輸波兼畀到曼城後來居上嘅機會，咁蹺當年同一輪曼城作客輕取水晶宮2比0，戲碼同今晚一模一樣，好多人都擔心會歷史重演，傳媒亦狂煲今輪係爭標關鍵一輪。不過紅軍主帥高普強調，除咗已淪為後備嘅門將米洛列特之外，當年對車仔嘅正選陣容其餘10人已經離隊，同依家呢隊係完全唔同嘅球隊，冇人有心理陰影。高普雖然咁講，不過球員能否擺脫29年無冠（聯賽）所帶來嘅心理包袱，將會成為佢哋首度稱霸英超嘅關鍵，因此今晚對車仔，係一個衝破枷鎖嘅重要關口。
金句:紅軍心理枷鎖可以解放？還是曼城體力能夠支持？