29年未攞過聯賽冠軍
英超進入最後直路，曼城與利物浦叮噹馬頭，29年未拎過頂級聯賽冠軍嘅利物浦，剩番最後5輪比賽最惡啃就係今場鬥車路士。樂比相信以紅軍目前氣勢，再下一城絕冇問題，反觀車仔爭歐聯席位仲有籌碼在手，飢渴感遠不及紅軍，利物浦讓半一樂比支持上盤。
（now 621周日晚11時30分直播）
利物浦對上一次頂級聯賽捧盃已經係1990年，當時英超仲未成立，球隊上下個個恨呢隻盃恨到流晒口水，即使歐聯目前形勢大好，八強首回合領先波圖兩粒，相信班球員亦會暫時將盃賽放埋一邊，疊埋心水爭聯賽，畢竟曼城餘下賽程相當難踢，包括要對熱刺及曼聯，利物浦只要做好自己唔係冇機，利物浦球員飲得領隊高普嘅心靈雞湯多，心態上硬淨咗，最低限度會好過今場對手車路士。
車路士兼顧歐霸輸決心
車路士內部立立亂，未踢今輪之前排名第3已算係奇迹，領隊沙利不得民心，成日畀自己球迷柴台，「沙利波」由蓋世神功變成笑柄，過程只需幾個月，最慘係球員內部唔團結，夏薩特下季走人似乎已成定局，陣中冇一個領袖級人馬，車仔前途確實令人擔心。
睇番車路士今季踢硬仗成績甚差，尤其係作客更慘不忍睹，對住前列嘅曼城、熱刺、阿仙奴、狼隊、甚至愛華頓全敗，每場起碼失兩粒，主要原因係沙利戰術古板，無論對咩對手戰術都一成不變，靠軟弱嘅佐真奴費路扼守中場，加埋一條水平走下坡嘅防線，真係好難守得住大勇嘅沙迪奧文尼及重拾射門鞋嘅穆罕默德沙拿。沙利今季餘下任務係力爭歐聯入場券，但其他對手近期相繼失分，令車仔搶分壓力大減，加上目前歐霸爭標尚算樂觀，車仔爭來季歐聯席位仲有另一途徑，決心上唔夠絕無退路嘅利物浦！