防線殘缺歐霸跟尾
今晚英超獨腳戲，「6哥」阿仙奴要作客硬撼「大黃蜂」屈福特。阿仙奴一向主強客弱，呢點亦係拖累佢哋嘅聯賽成績，而且表現穩健嘅中堅柏柏斯達夫普路斯今仗要坐波監，加上有歐霸顧慮，讓唔起主場硬淨嘅屈福特，讓球主勝有買趁早。
（Now 621周二凌晨3時直播）
依家踏入球季關鍵時刻，未計周日賽事，已淪落「6哥」嘅阿仙奴，仍要為爭前4及歐霸冠軍拚搏。不過「兵工廠」主、客場表現反差太大，佢哋聯賽主場17戰贏14仗，但15場聯賽作客贏得5場，單計近9仗作客聯賽，僅得1勝3和5負，唯一勝仗亦只是擊敗已篤定降班嘅弱旅哈特斯菲爾德，Big 6球隊嚟講真係曳到冇朋友，難怪艾帥都話要同眾將討論到底客場出現乜嘢問題，總係唔能夠用平常心面對。
除此之外，今季喺阿仙奴一柱擎天嘅中堅柏柏斯達夫普路斯要坐波監，冇咗佢坐鎮防線，雖然仲有哥斯尼同蒙利爾，但另一個位要焗用時好時壞嘅梅斯達菲，隨時成為計時炸彈，何況周中仲要出戰歐霸8強次回合作客拿玻里，就算首回合贏咗2比0，不過佢哋作客連巴迪都輸，絕對唔穩陣，連同艾朗藍斯、格列沙加都係好番冇耐，今仗隨時留力。
屈福特主場硬淨受讓筍
相反，屈福特喺上周英格蘭足總盃4強對狼隊，喺落後2球下法定時間扳平2比2，加時更以3比2反勝對手殺入決賽，士氣大振。睇番兩軍近4次交手，各得2勝2負不相上下，加上「大黃蜂」主場唔係好蝦，近7仗主場聯賽，取得4勝2和僅1敗，非常硬淨，主場有得受讓咁筍，讓球主勝值得捧場。