周三凌晨另一場歐聯8強次回合，祖雲達斯主場迎戰阿積士。祖雲達斯今季歐聯主場出擊氣勢不俗，尤其有歐聯射手王基斯坦奴朗拿度（C朗）擔正，前場火力有保證，對住攻强守弱嘅阿積士，祖記贏波信心十足，主勝唔好錯過。
（Now 644、有線602及662台周三凌晨3時直播）
C朗近屆歐聯8強喪入波
祖記首回合同阿積士打和1比1，搶得關鍵作客入球，呢場數字上只要以0比0悶和對手就可以晉級，不過祖記作為歐聯勁旅，喺自己主場出擊又點會甘於踢得咁保守，今屆球隊歐聯4次主場取得3勝，其中就包括早前喺16強次回合，以3比0擊潰以防守見稱嘅馬德里體育會，威力驚人。隊中最强武器肯定係C朗，呢位葡萄牙球星雖然早前國際賽受傷，不過一復出，就喺首回合面對阿積士一仗頭槌破網，極速上力。
C朗暫時以125球高踞歐聯史上射手榜榜首，其中有64球都係喺淘汰賽取得，尤其入到8強特別醒，近4屆7次出戰8強，有6次都搶到士哥，計埋加時賽，C朗喪入咗12球，堪稱喺淘汰賽入球機器。呢場對住後防唔算穩陣嘅阿積士，睇好C朗再數胡為祖記搶W。