英超內訌Part 2有你冇我
今晚歐聯8強次回合續演「英超內訌」，曼城主場再撼熱刺。曼城首回合落後緊1粒，正如主帥哥迪奧拿話齋今仗冇得諗，為晉級一定狂攻；熱刺雖有哈利卡尼缺陣，但球隊演出反更銳利，加上雙方近年喺「藍月亮」地頭碰頭，經常大手交易，進取啲敲2.15倍嘅3.5球大盤！
（myTV Gold 303、Now 643、有線656及616台周四凌晨3時直播)
曼城首回合作客熱刺雖然輸0比1，但踢落係略佔上風，輸波關鍵除咗阿古路初段射失12碼外，主帥哥迪奧拿將奇雲迪布尼及利萊辛尼擺喺後備而飽受批評，曼城為保「4冠王」美夢已冇退路，哥帥都話若果首回合0比0嘅話，今仗都唔知攻定守好，依家落後緊反而唔使諗咁多，一定狂攻爭勝。
卡尼養傷 釋放孫興民
佢哋日前聯賽贏水晶宮3比1，史達寧省兩粒終止4場入球荒，迪布尼更交出2次助攻，前線個個都咁弗，令曼城於今季各項賽事勁轟150球，係歐聯5大聯賽首支能做到嘅球隊，今仗一定火力全開。
熱刺王牌哈利卡尼喺首回合中段傷出，今仗肯定缺陣，好在孫興民挺身而出射入奠勝球，球迷應該記得卡尼上次養傷期間，「老孫」4次為熱刺正選上陣皆有士哥，帶領球隊4連勝，反映「哈神」缺陣令佢更有發揮，另一鋒將盧卡斯莫拉上場聯賽更大演帽子戲法，其中一球正正係「老孫」助攻，守將維頓漢亦講到明唔會死守，希望搶得作客入球令曼城陷於被動。
翻查往績，曼城今季26次主場未試過食白果，近5次主場鬥熱刺獲3勝1和1負轟17球，而熱刺只有1次交白卷，其中4場開4球或以上，鬥攻格局實多波入，捧3.5球嘅大盤。