今晚除歐聯之外，意甲、法甲都有補賽獨腳戲上演，其中巴黎聖日耳門（PSG）只要作客擊敗南特便可宣布提早封王，上場佢哋作客里爾大敗1比5，相信今仗會的起心肝省招牌，撞正上場爆冷擊敗里昂、信心爆棚嘅南特，入球大可作過關重心。
（myTV Gold 302、Now 639、有線615及655台周四凌晨1時直播）
PSG上場作客聯賽「2哥」里爾，原本攞1分已經夠捧盃，點知上半場中段有祖安巴尼特領紅牌被逐，人少打人多之下最終大敗1比5，成為球會近19年嚟聯賽輸得最大比數嘅敗仗。雖則話呢場輸波對佢哋捧盃冇乜影響，只要今場贏波佢哋一樣可以宣布提早封王，但自從卡塔爾財團QSI入股後，PSG從未試過單場失5球，而且佢哋已經連續兩場聯賽失分，為挽回豪門聲譽，點都要加多兩錢肉緊向球會及球迷交代。
拉素近5鬥烏甸全勝
南特近3場主場贏2場，包括上場擊敗聯賽榜「3哥」里昂，狀態唔曳，佢哋依家領先尾3嘅迪安9分，護級壓力大減，冇包袱分分鐘同PSG鬥攻，中位數2.5/3球捧大好路。
另外意甲拉素主場鬥烏甸尼斯，拉素現排第8，落後4哥AC米蘭6分但少踢1場，今場贏波仲有機會爭張歐聯入場券。烏甸尼斯近6場作客聯賽輸5場，而且近5次對拉素全部輸晒，今場捧讓球主勝。（myTV Gold 301、Now 638、有線614及654台周四凌晨1時直播）
最後美職西岸賽事，FC洛杉磯作客鬥溫可華白帽，FC洛杉磯開季7場聯賽6勝1和，勢如破竹，相反白帽6戰未贏過，實力、狀態有明顯分野，FC洛杉磯客勝咪錯過。