今日阿King轉吓口味玩亞洲波，啱心水記得早啲落注，重心推介係日職重頭戲浦和紅鑽主場鬥神戶勝利船，兩軍近10次交鋒有9次開3球或以上，勝利船今季頭重腳輕，顧得進攻卻忽略防守，2.5球大盤可作為過關首選。（有線603及604台周六中午12時直播）
勝利船坐擁韋拿、普多斯基及恩斯尼達呢個「進攻鐵三角」，鋒力當然不成問題，可惜佢哋防線太鬆散，個別球員質素完全唔夠班，上場鬥廣島三箭兩度領先，最後都要反輸2比4，充分反映問題所在，雖然西班牙主帥尼路周中已辭職，重召上年9月被炒嘅吉田孝行回巢頂擋，不過一時三刻相信好難有咩大改善，何況普多斯基仲因無癮辭任隊長。紅鑽近5仗僅2勝，而且有4場比賽有失波，後防表現亦唔係好，既然大家都係不設防球隊，今場捧2.5球大盤最啱數。
鹿角3連勝上盤要追
其餘兩關先講日職鹿島鹿角主場鬥仙台維加泰。鹿角下周雖有亞冠盃後顧，不過連續兩場都喺主場出擊，相信唔使過分留力，佢哋聯賽加盃賽主場3連勝，對住作客聯賽3連敗嘅仙台維加泰勝算高，主隊讓半一捧上盤。（周六下午2時開賽）
最後一關揀澳職，布里斯班獅吼主場鬥紐卡素噴射機，兩軍已無緣季後賽，今場冇咩心理包袱，獅吼近7場聯賽入11球、失21球，單計上半場有5場至少有2球交收，1.5球半場大必捧。（myTV Gold 302、Now 639、有線615及655周六下午3時35分直播）