復活節假期，又係星期六晚，今晚德甲加開深夜場，史浩克04主場迎戰賀芬咸，史浩克要搶分護級，不過賀芬咸係德甲其中一支狀態最火熱球隊，正全力爭奪下屆歐洲賽入場券，計實力同狀態亦遠勝衰落中嘅史浩克，賀芬咸讓半一照捧上盤。
（Now 672、有線653及613台周日凌晨2時30分直播）
年僅31歲嘅拿高斯文唔只喺德甲炙手可熱，佢過去兩三季帶領賀芬咸嘅表現，甚至贏得全歐洲尊重，連名帥哥迪奧拿都話要喺佢身上學習，而德甲「小富豪」RB萊比錫更有先見之明，晨早預訂咗佢下季過檔領軍，不過拿高斯文對賀芬咸始終有深厚感情，自上月初起，已多次聲明要為球會爭奪下屆歐洲賽入場券，而球隊亦以火熱狀態同入球能力兌現承諾，目前聯賽榜排名已經由第9位升上第6，拿高斯文今仗賽前更調整目標，話要喺餘下5輪聯賽全勝攞晒15分，除確保下季有得踢歐霸外，仲希望能奇迹後上搶得歐聯入場券。
史浩克近期有老帥史堤芬斯出山救亡，但球員質素明顯今不如昔，上輪護級戰對紐倫堡形勢上根本唔夠揪，全靠門將紐布屢救險球至唔使輸，遇大勇嘅賀芬咸難有運行。