德甲狀態士氣都甚佳嘅緬恩斯同杜塞爾多夫較量，我哋安排咗英語旁述。兩軍近期前線都交足貨，而且聯賽冇晒壓力可以大踢風流波，預期會繼續有前冇後踢法，為大家獻上精彩入球騷，大盤係穩陣之選。
（on.cc東網周六晚9時30分直播）
雙方目前分列聯賽榜第12同第10位，既冇降班威脅，亦冇爭踢下屆歐洲賽野心，而事實上以兩會投資同規模，攞到目前成績已經超額完成，所以雙方大營都充滿歡樂氣氛。
桑馬迪達火併盧克巴基奧
緬恩斯經過早前搶夠分Hea咗一輪後，前仗主場突然發威，以5比0大炒堅硬淨嘅弗賴堡，快速行軍加上超強把握力震驚德甲，箭頭桑馬迪達仲連中三元大爆發，跟住上輪作客多蒙特喺半場落後兩球下力追，全場射門比「蜜蜂兵團」更多，下半場拉近比數後，到尾段仲差啲扳平，若非多蒙特門將路文貝基補時階段喺白界前連環3次神救，緬恩斯已經喺西法倫球場搶到分，今晚返到強項主場強陣出擊，當然會趁勇繼續搶攻。
杜塞爾多夫係公認今季德甲最神奇球隊，上輪對班霸拜仁初段表現慢熱失咗先機，但後段發力還擊都唔講得笑，比利時鋒將盧克巴基奧再喺拜仁身上入到波，今晚對手級數轉弱，老帥芬基決定放手一搏，將盧克巴基奧同賓尼圖拉文呢對比利時孖寶一齊放喺正選名單，擺明要同主隊駁火，不過佢哋防線少咗重心基斯素文影響甚大，今季佢只缺陣過兩場比賽，呢兩場波杜塞爾多夫共失11球，今晚作客難保不失，預期呢場會係可觀入球騷，求穩嘅可捧中位數2.5球大盤，想好分博埋3.5球大盤都唔過分。