快將踏入4月尾，亦係球季轉彎入直路階段，隨住近年使用VAR（視像裁判）日漸普及，球證可翻睇電視片段再作出判決，令以往因走漏眼而導致輸冤枉波嘅情況，大大減低，值得表揚。
好似周中歐聯8強次回合，利物浦作客波圖之役，埃及王子穆罕默德沙拿妙傳沙迪奧文尼一腳，球證透過VAR可清楚睇到並冇越位；另一場曼城激鬥熱刺，熱刺更因2次VAR判決而獲利，箭頭洛蘭迪嘅頭槌入波，雖有輕微手球之嫌，但個波最主要係撞到佢大腿近屁股位置彈入，而補時階段曼城翼鋒史達寧嘅入波，球證通過重播睇到個波掂到隊友貝拿度施華改變方向，再交到處於越位嘅阿古路，因此越位在先被判無效，非常正確。
等睇球證判決都有戲味
作為教練嘅我，同一班小將嘅家長傾談中亦獲得啟發，佢哋話唔介意用VAR，雖然需要多少時間及耐性，等待球證睇片後再判決，但正正係加入呢幾分鐘，除咗增加咗公平之道外，亦喺等待過程中，為球賽增添咗懸疑、緊張、焦慮等元素，以及判決後雙方嘅喜怒哀樂。單以曼城末段史達寧建功為例，「藍月亮」球員及球迷由絕殺對手嘅歡喜若狂，到等待球證睇片時嘅焦慮不安，到「被消失的絕殺」感到極度失落，另一邊廂熱刺則反之，短短幾分鐘從地獄返上天堂，呢點係VAR為比賽帶來引人入勝之處。今晚英超頭場曼城再鬥熱刺，「藍月亮」為保聯賽冠軍不容再失，熱刺未必再有歐聯時嘅運氣，相信曼城可重拾心情贏波返正軌。