4度對決最終回
曼城同熱刺經過周中嘅歐聯世紀大戰後，今晚英超聯賽再重逢。好多人替曼城VAR爭議出局感到不值，今晚正好係報仇好機會，而目前形勢亦清楚不過，曼城希望力爭聯賽寶座，熱刺則希望力保前四，相信今場入球就算冇周中咁多，打個折扣都足以開到大，樂比撐3/3.5球嘅大盤。（Now 621周六晚7時30分直播）
曼城目前落後榜首利物浦2分但少踢1場，只要今仗贏波就可暫時登上榜首，所以主動權仍落喺佢哋手上，以曼城一貫嘅踢法同近期狀態，其實又唔需要太擔心，畢竟佢哋喺主場各項賽事加埋已13連勝，加埋入咗53球之多，平均每場自己一隊都入4粒以上，開大絕對有保證。
事實上，曼城嘅高位壓迫及進取踢法，係完全唔會畀對手喘息機會，即使今季主場對Big 6球隊，都取得全勝兼多波入，除對防守最強嘅利物浦僅入2球外，其餘起碼都入3球或以上，可見攻力之強，加上腳風甚順嘅阿古路同史達寧正力爭神射手，今仗對熱刺肯定唔會手軟，甚至會力爭得失球優勢，以備不時之需。不過曼城防線其實又唔算非常穩陣，好似周中對熱刺時中堅拿樸迪多次犯錯，以熱刺近期嘅氣勢要入波並唔困難，所以捧大似乎係最佳選擇。
熱刺用孫興民火力仲勁
熱刺近日雖然有首席射手哈利卡尼重創，但多場賽事已證明，冇咗哈利卡尼嘅熱刺其實更有威脅，尤其係對強隊打突擊時，孫興民踢最前可謂如魚得水，睇番熱刺今季缺少「哈神」嘅5場聯賽均全勝，可見熱刺入波絕對唔係靠佢。另外熱刺近年作客曼城都例多失波，近6次作客曼城失咗21球之多，加上近期作客失波相當嚴重，近8場作客有7場係失2球之上，綜合多項數據，睇嚟今場都會係一場大比數賽事。