意甲周日凌晨壓軸好戲，仲有國際米蘭主場硬撼羅馬。羅馬為爭來季歐聯席位，可以話1分都唔少得，可幸首都球隊喺老帥雲尼亞里回歸後，走勢穩步上升，呢場對住主場表現飄忽嘅國米，羅馬有力搶分，受讓之下2.16倍讓球客勝咪錯過。
（myTV Gold 301、Now 638、有線614及654台周日凌晨2時30分直播）
力爭來季歐聯席位嘅羅馬，早前喺歐聯16強出局後即炒前主帥迪法蘭斯高，而曾經喺轉會市場呼風喚雨嘅總監蒙奇冇幾耐都要離隊，如今羅馬揾嚟「補鞋匠」雲尼亞里救駕，總算暫時穩定軍心，近期取得聯賽2連勝。除咗前鋒迪斯高喺上仗打破入球荒之外，被譽為「新托迪」嘅小將尼高路辛尼奧路表現亦日漸成熟，有力擔起羅馬搶分重責。
國米近3主場食白果
同為前列分子嘅國際米蘭，近3仗主場未贏過之餘，更加係1球都入唔到，飄忽表現令球迷唔多滿意，加上波索域同維沙積高兩位中後場主力齊齊有傷倦勤，令戰力大打折扣，今場冇晒士氣低頭出擊，隨時再有閃失，實在讓唔起羅馬，捧讓球客勝好過。