歐聯衰咗聯賽捧盃攞尾彩
周日凌晨意甲重頭戲，祖雲達斯主場迎戰費倫天拿。做咗成季意甲1哥嘅祖記，今場只要同對手打和就可以提早聯賽封王，不過祖記啱啱歐聯出局，返到聯賽肯定揾硬「紫百合」出氣，睇好基斯坦奴朗拿度帶領「老婦人」狂數對手，中位數2.5球入球大不容錯過。（MyTV Gold 301、Now 638、有線614及654台周日凌晨零時直播）
祖記雄踞意甲多年，單單聯賽冠軍已經滿足唔到佢哋嘅野心，可惜球隊啱啱喺歐聯畀阿積士技術性擊倒，8強止步，再次喺歐洲頂級賽事失利，表現令人失望。如今可以心無旁鶩專心聯賽嘅祖記，只會加快聯賽捧盃的進度。為搶回顏面，祖雲達斯或會派出C朗同摩斯堅恩兩位弗爆前鋒擔正，前者為爭意甲神射手獎，肯定要搏盡搶士哥，而後者雖然年僅19歲，不過聯賽下半程成功靠爭氣表現迅速上位，近4場聯賽都有波入，兩人雙劍合璧火力絕對有返咁上下。
蒙迪拿教費倫有前冇後
走勢迅速下滑嘅「紫百合」，已經近8輪聯賽未贏過波，球隊啱啱就揾返「飛機仔」蒙迪拿重執教鞭，頂替早前離隊嘅前主帥皮奧利，希望呢位名宿可以帶領費倫走出困局。不過有睇開蒙迪拿教波，都知道由佢揸弗嘅球隊通常都踢到有前冇後，處於重整階段嘅費倫，今場睇怕都好難成為祖記奪冠路上嘅絆脚石。回顧往績，祖記近5次主場面對費倫，取得4勝1負，其中4次開3球或以上，今場入波肯定唔少，中位數2.5球入球大捧得過。