因傷抖咗3個月嘅巴黎聖日耳門（PSG）球星尼馬終於傷愈，可以喺周一凌晨法甲復出對摩納哥，正好趕得切為PSG捧盃！根據法國媒體《RMC》爆料，尼馬自4月初復操之後，傷勢並冇復發，而且已經接近操起十足狀態。加上PSG現時有唔少傷兵，教練杜曹都希望見到尼馬盡快重返球場，振奮士氣。
尼馬對上一次為巴黎聖日耳門上陣已經係1月23日，佢缺陣之下，PSG受到多次嚴重打擊，包括歐聯16強被曼聯淘汰，近3場聯賽更加只有1和2負，搞到連接錯過提早奪冠嘅機會。PSG只要今場擊敗摩納哥，就可以奪得法甲冠軍，莫非球隊近期連接失分，係為咗等埋尼馬復出先至捧盃，畀佢做主角？（myTV Gold 302、Now 639、有線615及655台周一凌晨3時直播）