防線甩轆爭前4照樣谷
周二凌晨英超獨腳戲，車路士主場鬥般尼。仲想爭英超前4嘅車仔，上輪輸畀死敵利物浦之後，已經冇空間再甩轆，呢場為全取3分肯定焗攻，可惜球隊近期後防唔爭氣，對住般尼隨時再有失波，捧番中位數2.5球入球大好過。
（Now 621周二凌晨3時直播）
車仔上輪淨吞利物浦2蛋，爭前4形勢陷於被動，領隊沙利仲想透過英超前4爭來季歐聯資格，嚟緊1分都不能少。好彩夏薩特近期挺身而出大踢爭氣波，近3仗聯賽個人入3球貢獻1次助攻，雖然上仗歐霸佢整親被換離場，不過據報已經康復可以隨時候命，繼續成為車仔最具威脅的攻擊手。相反車仔後防表現失色好多，啱啱喺歐霸次回合面對布拉格斯拉維亞，竟然一場失咗3球，加上主力中堅魯迪格呢場上陣成疑，車仔想力保不失都幾難，寧願前場入多兩球好過。
般尼近11仗得1場冇波入
般尼一改守強攻弱嘅風格，近11場聯賽僅1場交白卷，不過球隊對住强敵表現令人失望，今季5次造訪Big 6球隊輸咗4仗，仲狂失15球，其中4次開3球或以上，呢場主勝太熱唔好分，轉捧中位數2.5球入球大更划算。