世上最多擁躉球隊之一嘅曼聯，自從傳奇領隊費格遜於2013年退休後，歷經莫耶斯、尹戈爾、摩連奴及蘇斯克查（蘇B）4名主帥，但戰績浮浮沉沉，失去昔日王者風範。最奇怪的是，明明蘇B接手後，紅魔連場報捷，踢到風生水起，甚至獲扶正簽約3年，但忽然大跌Watt，近5場輸咗4仗，原因何在呢？
記得喺曼聯所向披靡嗰陣，於3月中聯賽輸畀態沉嘅阿仙奴，迎來蘇斯克查接手後聯賽首敗，之後再喺英足盃畀狼隊踢出局，當時我收聽一班外國資深球評家嘅節目，佢哋話蘇斯克查連輸兩場，可能依家係噩夢開始，佢能否力挽狂瀾，要視乎3至4月嘅成績。世上沒有不敗雄師，只係2連敗即發出如此悲觀論調，我都覺得佢哋太過苛刻，但隨住傷兵漸多，輸吓1場又1場，歐聯8強遭巴塞淘汰，去到日前復活節假期嘅聯賽變受死，慘吞愛華頓4蛋，搞到蘇B賽後都要向球迷道歉。
勢估唔到嗰班球評家預言咁準，的確從近期比賽中，可見紅魔眾將失去鬥心，有傳陣中本土幫與西班牙幫內訌，遲遲未獲續約嘅迪基亞，由神龍變成「黃大仙」般有「球」必應，猶如去番摩連奴時期。曼聯喺今晚英超要迎戰同市死敵曼城，係全季最關鍵一戰，贏波的話，既可保持爭前4機會，亦可打擊死敵爭標，但依家佢哋高層、教練團到球員之間又貌合神離，處於最糟糕情況，面對勢兇夾狼嘅「藍月亮」，就算想反彈亦非常困難。