周四凌晨英超爆發曼徹斯特打吡，紅魔鬼曼聯於奧脫福主場迎戰藍月亮曼城。曼聯自從蘇斯克查坐正後成績不升反跌，上場淨吞愛華頓4蛋士氣更跌落谷底；相反曼城為爭標一分都不能少，加上曼城近7季聯賽作客奧脫福取得5勝1和1負，曼城讓一球上盤博得過。
（Now 621周四凌晨3時直播）
曼聯目前比多踢1場嘅4哥車路士少3分，爭入前4未絕望，但自從曼聯上月尾與蘇斯克查簽下3年長約，佢哋聯賽加盃賽6戰僅2勝，包括喺歐聯被巴塞隆拿雙殺8強出局，上場作客愛華頓更慘吞4蛋，不單錄得作客5連敗，而且今季聯賽已失48球，創下英超成立以來單季最多失波紀錄，就連以往表現最穩健、多次「一個救全家」嘅門將迪基亞近期都甩甩漏漏，可見曼聯現時後防的確千瘡百孔。
曼聯攻守都唔掂
進攻方面，拉舒福特、保羅普巴及連格亦失去了蘇斯克查擔任看守領隊時嘅鋒芒，無論攻守問題都唔係一朝一夕可以解決。
曼城喺歐聯8強出局後，現階段可專心聯賽角逐，依家佢哋比利物浦少2分兼少踢1場，只要贏晒餘下4場便可衞冕成功，當中最難應付相信就係今場對曼聯，只要闖過呢關，爭標前景將一片光明。曼城上場對熱刺雖有中場奇雲迪布尼傷出，不過阿古路、史達寧及貝拿度施華去到季尾狀態大勇，前兩者更有力問鼎神射手，為搶3分必強攻對手。睇番曼城過去7季聯賽作客曼聯攞到5勝1和1負，當中3次贏得英超冠軍球季，包括11/12、13/14及17/18都能揚威奧脫福，如果今場失分，分分鐘輸埋士氣斷送冠軍，曼城讓一球波童捧上盤。