意大利盃4強次回合殺到埋身，on.cc東網將會一連兩晚免費直播畀大家，今晚先有AC米蘭返主場硬撼拉素。首回合互交白卷，不過AC係正宗主場龍，喺自己地頭出擊有保證，反而拉素箭頭恩莫比尼近期熄晒火，今場開平手盤，「紅黑兵團」坐和望贏。
（on.cc東網周四凌晨2時45分直播）
首回合悶和0比0，查實雙方近況都麻麻，AC近6仗只得1勝，拉素則近5仗僅1捷，真係半斤八両，但要留意，AC之前2仗取得1勝1和，而嗰場勝仗就係主場贏拉素1粒，可見佢哋開始重上正軌，之前受傷嘅門神基安盧基當拿隆馬同後衞沙柏達華倫西亞已經好番，並喺上仗聯賽復出，有助鞏固防線，而畀人批評近期冇料到嘅中場蘇索，上仗亦交出助攻，配合「新羅拔利雲度夫斯基」嘅比亞迪克，攻力唔曳。AC今季主場出色，17場主場聯賽取得10勝4和3負，係主場成績第3好球隊，上圈意盃亦喺主場贏拿玻里，喺自己地頭出擊特醒。
拉素恩莫比尼死晒火
相反，拉素一向靠神箭恩莫比尼數胡，但呢位意大利國腳狀態低沉，近6仗入得1粒咁大把，腳風唔順，日前聯賽更衰到輸畀包尾兼篤定降班嘅基爾禾，仲有路爾斯阿拔圖同米連高域沙域做埋「紅牌阿姑」，睇得出成班波踢到好躁，咁樣輸波都幾打擊士氣。翻查紀錄，雙方近6次正面交鋒，AC取得2勝4和未輸過，明顯剋住拉素，今仗主場出擊唔使讓波咁筍，平手盤必捧「紅黑兵團」。