中國人有句俗語「反轉豬肚就係屎」！之前中國球星武磊加盟愛斯賓奴，唔少內地球迷即刻化身「愛奴」球迷，追蹤「武球王」一舉一動，全力為愛奴及武磊打氣。不過球隊上場作客和利雲特2比2一仗，「武球王」畀主帥魯比全場擺喺冷板櫈冇得出，搞到佢英雄無用「武」之地。
今晚鬥切爾達難言穩勝
賽後一班睇住偶像「委屈」做後備嘅球迷，紛紛變做「鍵盤戰士」，喺愛斯賓奴嘅社交網瘋狂留言，鬧爆魯比及球會，仲有人留言話想見到佢哋降班，亦有人講明唔用武磊，就會「Unfollow」球會，今晚愛斯賓奴主場對切爾達，唔知魯比會唔會屈服搵番「武球王」落場呢？
不過就算「愛奴」有「武球王」壓陣，要攞3分亦唔易，事關切爾達自從射手伊亞高艾斯巴斯復出後，戰績明顯有改善，近5場聯賽獲3勝1和1負，其中艾斯巴斯個人勁轟6球。未計周三凌晨賽事，切爾達只比尾3嘅華拉度列多3分，仲未脫離降班威脅，今晚搶分決心肯定強過打風流波嘅「愛奴」，相信以切爾達近期狀態同鬥心，力足坐和望贏。
（Now 630及634周四凌晨2時30分直播）