挑戰拜仁喪攻博奇迹
德國盃準決賽上演重頭戲，雲達不來梅主場挑戰拜仁慕尼黑，兩支德國盃史上奪標次數最多球隊碰頭（拜仁18次、不來梅6次），不來梅剛於上周末德甲作客安聯球場，畀拜仁打破多項良好紀錄，甚至重重打擊佢哋透過德甲爭下屆歐霸席位機會，今晚返到主場聲言棄守搶攻，希望一舉攻破宿敵殺入決賽，爭取憑德國盃冠軍資格參戰下屆歐霸盃，遇上近期火力十足嘅拜仁預期會係入球騷，黑柴博中位數3.5球大盤。
（周四凌晨2時45分開賽）
不來梅今季以老帶新，踢出悅目進攻足球，上仗作客拜仁之前，仲保持住跨季30場德甲場場有波入，同埋2019年未輸過嘅優良紀錄，不過基於作客安聯球場遇強敵，教練高菲特戰術以穩為先，亦一度困擾到拜仁，可惜踢到58分鐘中堅維爾高域被逐，踢少個最終僅輸0比1，今年不敗身同德甲連續入球紀錄同被終止，聯賽榜亦停留喺第8位，爭下屆歐霸席位形勢更被動，賽後球隊上下聲言返主場勢同拜仁搶攻，曾經效力過拜仁，年過40嘅傳奇射手比沙路今仗會先任後備，佢話盃賽踢法同聯賽係兩回事，佢哋今晚充滿決心求創奇迹，仲好肯定咁話不來梅會入到波添！
拜仁中堅歷卡斯蘇尼停賽
拜仁近期愈戰愈勇，德甲爭7連霸已重掌主動權，何況喺歐聯出局後，全隊上下包括教練尼高高華，對德國盃都志在必得，如果去到球季結束只得德甲1個冠軍，對呢支班霸嚟講勢難交代，好在佢哋今仗有足夠理由樂觀，因為拜仁一向係不來梅尅星，自2010年10月起計埋德甲同德國盃，佢哋19次對不來梅竟然取得全勝，球隊前線近期狀態亦出色，唯一顧慮係防線唔齊人，門將紐亞養傷本身已經打擊甚大，今仗首席中堅歷卡斯蘇尼停賽，作客韋沙球場相信難保清白之身。