意大利盃4強次回合，阿特蘭大返主場再鬥費倫天拿。首回合激和3比3，阿特蘭大不嬲進攻大過天，射手杜雲沙柏達腳風順到冇朋友，「紫百合」痛失3個作客入球，為殺入決賽更不能坐以待斃，今場大細中位數2.5/3球，鬥攻格局必捧大盤。
（on.cc東網周五凌晨2時45分直播）
阿特蘭大在「進攻狂人」加斯柏連尼掌舵後，近3季都高舉喪攻旗幟。加帥一向「不進攻、毋寧死」，除沿用佢以往執教熱拿亞嘅成名絕技343陣式，以及重用新人外，今季從森多利亞借得前鋒杜雲沙柏達，亦為佢搵到喪攻戰術嘅最後一塊拼圖，呢位哥倫比亞射手唔單止喺今季聯賽已入21粒，佢喺今屆意盃亦轟3球，腳風堅順，連埋費倫天拿棄將伊利錫，勢必火力全開。
兩軍教頭都係進攻狂人
費倫天拿早前有主帥皮奧利辭職，搵番曾教過3季嘅蒙迪拿回巢接手，「飛機仔」同樣崇尚進攻，日前聯賽首度領軍對榜首祖雲達斯，「紫百合」都冇死守，最終因自己擺烏龍反輸1比2，但可見「飛機仔」勇氣可嘉。由於首回合費倫喺主場只能打和3比3，畀阿特蘭大搶到3個作客入球堅蝕，唔好話輸波，就算今仗打和2比2或以下比數和波都要出局，在「星二代」基奧雲高施蒙尼及費達歷高基艾沙助陣下，必定搶攻爭勝。癲鳳鬥狂龍，阿特蘭大近9仗主場7次開3球或以上，梗係捧入球大喇。