留力撼巴塞冇興趣炒哈
今晚英超獨腳戲，利物浦主場迎戰篤定降班嘅哈特斯菲爾德。紅軍豪取9連勝堅勁，不過嚟緊周中有歐聯硬撼巴塞隆拿嘅顧慮，今場面對弱到爆嘅哈特斯，隨時見好即收，領先緊就收韁，3.5球嘅入球細更加值博。
(Now 621周六凌晨3時直播)
利物浦臨近季尾即翻生，聯賽連盃賽在內豪取9連勝，現時落後曼城1分，依然保持爭奪聯賽冠軍機會，仲殺入歐聯4強，表現及成績更勝爭標勁敵曼城。不過紅軍嚟緊下周中歐聯4強首回合，要先作客「地上最強」巴塞隆拿，對方有弗到震嘅球王美斯助陣，而且魯營主場威力唔講得笑。相比之下，今場只是主場迎戰對弱旅哈特斯菲爾德，為免消耗太多體力及增添傷兵，影響到巴塞場波，隨時入波後即收韁，甚至換走部分主力，只求贏波3分不求大炒哈軍。
近3對賽哈特斯食白果
包尾大幡哈特斯菲爾德曳到冇朋友，近13場聯賽輸咗12場，難怪提早宣布降班。哈特斯最大問題係攻力極度疲弱，今季聯賽合共僅入20球，唔單止係火力最弱嘅英超球隊，仲比入球第2少嘅卡迪夫城少10粒，陣中首席射手卡蘭格蘭入得4球咁大把，真係冇還手之力。哈特斯明知實力差幾條街，自上季升上英超後遇強必玩死守，近3次鬥利物浦全部食白果，兼全開3球或以下，何況已篤定降班，唔慌有戰意，造訪或略作保留嘅紅軍，捧3.5球嘅細盤更穩陣。