等入季後賽唔會搏盡
澳職最後一輪常規賽，今日先有場獨腳戲由墨爾本城主場鬥中岸水手。墨城現時僅餘數字上機會爭做常規賽5哥，更何況無論以第5或第6名進身季後賽，基本上分別唔大，倒不如留力應付季後賽好過，兩隊係現時澳職入波最少嗰兩隊，中位數3.5球嘅細盤捧得過。
（myTV Gold302、Now 639、有線615及655台周五下午5時50分直播）
隨着阿德萊德聯尋日以5比3反勝布里斯班獅吼，澳職常規賽前4排名已告塵埃落定，現時唯一未確定係邊隊可以攞到常規賽第5名。排第6嘅墨城現時以3分落後威靈頓鳳凰，得失球差亦落後6球，墨城如想做5哥，除咗要今場大勝水手，仲要寄望鳳凰喺最後一仗大敗畀珀斯光輝，不過有一點要留意，無論以第5名或第6名身份晉級，季後賽首圈都冇主場之利，唯一分別只係對手唔同。
墨城今季常規賽各鬥3哥墨爾本勝利及4哥阿德萊德聯3次，同樣攞到1勝2和不敗成績，所以對墨城嚟講最終排名唔算太重要，最緊要係唔好增添無謂傷兵、影響季後賽調動，今場會否搏盡真係好成疑問。
水手積弱入球能力低
連同今季在內，水手已經連續5季無法進身季後賽，其中更有3次排包尾，積弱絕非一朝一夕，不過水手近6場聯賽作客只有1次淨輸2球或以上，5次總入球開3球或以下，而且佢哋對上3次作客墨城都係僅輸1粒，形勢並非一面倒。墨城、水手係今季常規賽入波最少兩隊，弱弱對碰預計入波唔會多，大細中位數有3.5球，波童建議捧細盤。