華爾維迪學識見好即收
今晚西甲尾場「1哥」巴塞隆拿主場出擊，迎戰「小蝙蝠」利雲特。巴塞今仗只要贏波，即可提早蟬聯聯賽錦標，但考慮到有歐聯跟尾，或會收起部分主力，隨時見好即收；利雲特抱輸少當贏心態必死守，捧3.5球嘅入球細更佳。
（Now 632周日凌晨2時45分直播）
巴塞主帥華爾維迪吸取上季甚少輪換，搞到歐聯8強出局嘅教訓，今季加大輪換力度，好似周中快車作客艾拉維斯，正選就收起隊長美斯、拿傑迪錫及佐迪艾巴等主力，仍以2比0贏波。由於巴塞下周中歐聯4強首回合主場大戰利物浦，今仗有機會畀蘇亞雷斯、布斯基斯及菲臘比古天奴等先抖抖養精蓄銳，對進攻有一定影響。
「地上最強」依家領先次席馬體會9分，只要今仗贏波，即可提早3輪蟬聯冠軍，傳媒爆料話佢哋整定印有「11年8冠」嘅奪冠T恤慶祝，象徵近11季8度稱霸西甲，其中今季先加盟嘅中場維達爾，雖然唔係必然正選，但係華帥輪換下嘅重要棋子，可加強防守硬度。呢位「冠軍童子」喺2012至15年隨祖雲達斯連奪4次意甲冠軍，跟住2016至18年為拜仁連續3季德甲封王，假如贏埋西甲錦標，即連續8季贏得3大聯賽冠軍，仲威過C朗。
利雲特泊大巴輸少當贏
利雲特周中快車擊敗貝迪斯，暫時脫離降班區，雖然想繼續搶分護級，但造訪巴塞要攞分難過登天，預計都係死守只求輸少當贏。巴塞近8次主場出擊錄7勝1和佳績，不過其中6仗開3球或以下，可見佢哋學識見好即收，加上記掛歐聯，轉捧3.5球嘅細盤更為上算。