猛人傷愈強攻雷恩
法國足總盃周日凌晨上演終極決賽，雷恩於中立場聖丹尼法國球場挑戰巴黎聖日耳門（PSG）。PSG傷兵尼馬、卡雲尼及迪馬利亞皆已康復，為爭取5連霸必精銳盡出強攻對手；兩軍過去7次交鋒共炮製32球，6次總入球達4球或以上，波童建議捧3.5球入球大。
（myTV Gold 302、Now 639、有線615及655台周日凌晨3時直播）
對於上季包攬國內三大錦標嘅PSG嚟講，今季失落法聯盃已經算退步咗，所以佢哋對法足盃可以講係志在必得。PSG上周憑基利安麥巴比連中三元，主場以3比1擊敗摩納哥，正式宣布聯賽衞冕成功，而且PSG球迷最開心係見到幾名傷兵，包括尼馬、卡雲尼同達斯拿都已傷愈後備落場，另一中場迪馬利亞亦已在後備席候命，以上數人相信今場都可回歸正選名單，大有不勝無歸之勢。
對賽入波例多
不過，雷恩今季喺盃賽表現唔錯，法聯盃、歐霸盃分別殺入8強同16強，法足盃亦先後淘汰里爾、里昂兩支聯賽前列強隊，喺一場過嘅盃賽場合咩事都有可能發生，何況今場壓力全喺PSG身上，雷恩冇包袱可以踢得更放。
睇番兩軍近年對賽經常出現大手交易，近7次碰頭雷恩雖然輸咗6次，但當中只有1次冇入波，唔會因為對手財雄勢大、實力超班而刻意死守，PSG今場讓兩球，即要淨勝3球先開上盤，波童建議轉捧中位數3.5球嘅入球大仲穩陣。