英超爭標夠激，護級一樣咁好睇。兩支為爭留級嘅球隊卡迪夫城同白禮頓，今晚一前一後出場，卡迪夫城將會作客已降班嘅富咸，白禮頓則於主場迎戰「喜鵲」紐卡素。現時形勢排尾4嘅白禮頓比尾3卡迪夫城多3分，聯賽僅餘3輪表面上好似比較安全，弊在白禮頓近7場賽事一球都未入過，以投注角度，單憑「護級鬥志」幾個字，好難有捧場嘅說服力，相反無欲無求嘅紐卡素有得受讓，梗係揀「喜鵲」讓球客勝。
（Now 621周日凌晨零時30分直播）
「海鷗」白禮頓季初一度係英超盤王，長買長有，但自歇冬後急轉直下，踏入3月底戰績更加不堪入目，連同足總盃在內，近7仗只得1和6負，最弊係全部零入球。相反作客嘅紐卡素近兩場接連擊敗李斯特城同修咸頓，全取6分宣告護級成功，個勢咁靚，對住唔識入波嘅白禮頓，受讓抵玩。
卡城護級焗攻大鬧富咸
至於較早時間開波嘅富咸對卡迪夫城，卡迪夫城餘下賽程仲有主場對水晶宮同作客曼聯。相比之下今場可以話較易踢，為護級必定照搶攻，但篤定降班嘅富咸近期反而踢得更放，成功取得季內首次兩連勝，加上兩軍交手例牌鬥攻，近8次交手，全部都係雙方都有入波，不妨玩吓2.5球入球大。
（Now 621周六晚10時直播）