福地開騷孫興民去到盡
今晚英超頭場爆發倫敦打吡，「3哥」熱刺於新主場硬撼「錘仔幫」韋斯咸。熱刺嚟緊歐聯4強要火併荷甲班霸阿積士，自然唔想嘥太多力，射手孫興民歐聯要停賽，變相今晚唔使留力，面對踢緊風流波嘅韋斯咸，呢位「Oppa」勢必盡早爭取士哥幫球隊速戰速決，加上近年交鋒熱刺經常半場領先，1.78倍半場主勝有計。
（Now 621周六晚7時30分直播）
熱刺自從搬入新主場後堅老利，喺呢個球場出戰4仗，錄得全勝兼夾冇失波，更加喺歐聯淘汰曼城殺入4強。熱刺嚟緊下周中4強首回合先於主場迎戰阿積士，雖然阿積士都唔嘢小，但能夠避開巴塞同利物浦，絕對係佢哋闖入決賽良機，可能球迷會擔心佢哋聯賽會有所保留，但另一角度睇，熱刺保住英超前4亦相當重要，既然依家領先「5哥」阿仙奴4分，喺「搶4」路途上佔得先機，若然今仗贏埋的話，對往後比賽調兵遣將絕對百利而無一害，加上射手孫興民喺歐聯4強首回合要坐波監，今仗可以毫無保留盡情爭士哥，隨時半場就領先對手鎖定勝局，然後換走部分主力，最緊要踢得舒服。
韋斯咸風流波鬥心鬆散
位處中游嘅「錘仔」韋斯咸既冇降班危機，但爭歐洲賽席位亦渺茫，已經踢緊風流波等收咧，近4仗只得1和3負，計近6仗更有5次就半場落後畀對手，反映球員鬥心鬆懈。何況查維亞靴南迪斯、安祖卡路爾、耶莫蘭高及雲斯頓列特有傷在身，戰意、實力皆曳點信得過。就算單計雙方近5次交手，熱刺亦有4次上半場取得領先優勢，半場主勝有買趁早。