德甲今晚戲碼係杜塞爾多夫主場對雲達不來梅，今場我哋安排咗英語旁述，杜塞爾多夫近期喺冇晒壓力下大踢開放足球，而雲達不來梅想爭下屆歐霸入場券今場非勝不可，今仗預期又係一場入球騷，黑柴膽粗粗，推介有2.5倍嘅中位數3.5球大盤。
（on.cc東網周六晚9時30分直播）
杜塞爾多夫平均總入球3.6個
杜塞爾多夫係今屆德甲神奇球隊，目前排喺聯賽第10位已經係喜出望外成績，佢哋晨早護級成功後，仲大踢開放式進攻足球，成班波既有成績又好睇，自然博得球迷喜愛，睇番佢哋踏入2019年踢咗13場德甲賽事，全場總入球達到47個，平均每場炮製咗3.6個入球，而且係主場佢哋更加有前冇後，今季15場德甲主場7勝8負，永冇話同對手握手言和，仲經常不計勝負，去到比賽末段都空群搶攻，前線比利時孖寶盧克巴基奧同賓尼圖拉文已經踢出名堂，事實上佢哋今季剩低4輪聯賽，不論勝負都已經註定得到一個成功球季，嚟到呢個階段根本冇理由保守，勢必繼續踢進攻足球，同球迷一齊爽到底。
不來梅喪攻搶歐霸入場券
雲達不來梅表現同成績同樣令人滿意，尤其過去一星期佢哋喺德甲同德國盃兩鬥班霸拜仁慕尼黑都只係僅負，仲輸得有啲唔抵，輸咗比賽但已經贏盡掌聲。佢哋目前排第8位，但只落後第6位嘅賀芬咸4分，仲有機會爭奪下屆歐霸盃入場券，不過由於未來剩低嘅3輪聯賽要分別硬撼質態均佳嘅多蒙特、賀芬咸同RB來比錫，今晚遇上杜塞爾多夫已經係佢哋剩低落嚟最容易應付嘅對手，對呢3分絕對係志在必得，事實上佢哋前線狀態亦火熱，由老大哥麥斯古斯帶領住新星拉斯卡同艾格史甸兄弟嘅攻擊線，組織同入球能力都令人雀躍，今仗對住經常不設防嘅杜塞爾多夫，入波當然唔會少。