歐洲各大聯賽臨近尾聲，祖雲達斯及巴黎聖日耳門已順利封王，講到鬥得最刺激嘅，非英超及德甲莫屬，隨住利物浦昨晨贏波，打多1場領先曼城2分，英超爭標主動權仍在「藍月亮」手中，而拜仁同多蒙特喺德甲亦叮噹馬頭，但如果冇出意外的話，曼城與拜仁應該會率先過終點。
無獨有偶，高普現時執教嘅利物浦，以及昔日領軍嘅多蒙特，都係等待復興、並非財雄勢大嘅老牌勁旅，可見高普願意接受挑戰，希望慢慢組建一支打出其風格嘅球隊，唔似得摩連奴咁樣只求「即食」。兩軍原本在各自聯賽領放，可惜板櫈深度不足，季中略為「窒步」之下，包括次循環直接交手時輸畀曼城及拜仁，畀到對手從後趕上嘅機會，就算最終失落錦標，紅軍及蜜蜂兵團都毋須氣餒，因為兩軍能與兩大強中強由頭鬥到落尾，逼到對手打真軍，為球迷帶嚟精彩嘅一季，咁艱巨嘅任務唔係隊隊都做得到，佢哋嘅表現值得掌聲鼓勵。
迪基亞揸流攤抵鬧
今晚英超無論係李斯特城對阿仙奴，抑或曼聯對車路士，都屬困獸鬥格局。特別係睇過曼聯於上周中補賽淨吞曼城兩蛋之役，我同球迷茶餘飯後嘅話題，都離唔開神龍迪基亞跌Watt，球迷眼睛係雪亮，兩個失波都同迪基亞有關，作為一名職業球員，竟然因醞釀離隊致表現揸流攤，難怪畀球評家給予低分。