唔想攬炒 但求吊命
今季英超最後一場Big6大戰，曼聯主場對車路士。英超前4近期競爭激烈，皆因幾支競逐前4球隊輪流失分，令形勢更加緊湊。曼聯自蘇斯克查續約後氣勢全失，由天堂跌落地獄，至於車路士今季作客前列亦成績差劣，兩隊均有隱憂，樂比認為今場最大機會係和局，兩隊吊住條命留番最後兩輪決定命運。
（Now 621周日晚11時30分直播）
曼聯自蘇斯克查接手後，一度創下17戰14勝2和1負驕人戰績，不過自蘇B正式上位後，曼聯無以為繼，近9仗輸咗7場，情況仲嚴重過季初摩連奴執教之時，歸根究柢，都係球員質素未去到頂級，戰術上亦追趕唔到現時潮流，所以蜜月期一過，道氣洩咗又再打回原形，如果唔大換血及改革，實在難以再次稱霸英超。
講呢啲實在太長遠，現時排第6嘅曼聯歐聯席位相當不妙，分別落後第4嘅車路士3分及第5嘅阿仙奴2分，不過曼聯最大嘅優勢就係唔使打歐洲賽，而且餘下兩仗賽事相當易打，分別係下場對包尾嘅哈特斯菲爾德，同埋最後一輪對隨時已降班嘅卡迪夫城，照計曼聯有把握攞晒呢6分，反觀車仔同阿仙奴要搏歐霸之餘，剩番兩場亦較難啃，故今場和波對曼聯嚟講唔係太差結果。
車路士作客遇強曳爆
至於作客嘅車路士更加心繫歐霸，畢竟奪冠除咗可以幫領隊沙利拎到職業生涯首項錦標之外，更可以取得明年歐聯入場券，論機會同成效，點都好過搏聯賽拎第4名。
何況車仔今季聯賽作客強隊成績實在太差，作客聯賽積分榜上半版嘅球隊，7場輸足6場，唯一贏過嘅係屈福特，故今仗面對狀態低沉嘅曼聯，真係全無把握可言，和波保持住呢3分嘅距離，相信都係沙利可以接受嘅戰果，兩隊今場都唔想輸嘅情況下，有機會和波收場，3.35倍博得過。