今晚我哋直播賽事，係賀芬咸主場對禾夫斯堡，兩軍都正努力向下屆歐戰席位展開衝刺，不過相比之下賀芬咸前線實在着晒火，兩大神鋒貝科迪爾同卡拉馬歷入波易到好似食生菜，少帥拿高斯文較早前話明要贏晒今季餘下比賽，決心同信心都強到加零一，料可輕取作客欠還擊本錢嘅禾堡，賀芬咸讓1球、球半都冇有怕，黑柴撐上盤。
（on.cc東網周日晚9時30分直播）
賀芬咸臨近季尾至全面爆發，近期4連勝場場都唔只贏1粒，較早前主場大炒利華古遜表現銳利無匹，前線兩大神鋒貝科迪爾（圖右）同卡拉馬歷（圖左）把握能力超強，今季德甲已合共入咗31球，當中貝科迪爾近4場已經轟入7粒，無論頭頂腳踢，硬射或細膩過人甚至二傳都咁勁，睇到球迷眉飛色舞，少帥拿高斯文教埋今季就另有高就，過檔「小富豪」RB萊比錫，佢之前話臨走要送個歐霸席位畀球迷，但經過近期愈戰愈勇後，佢話不妨將目標調高啲，希望搶埋歐聯參賽資格添，雖然中場大腦迪米阿巴爾停賽，不過佢話心目中已經有唔只一個解決方案，無損今晚爭勝信心。
禾夫斯堡焗攻更易爆
禾夫斯堡上輪喺最後時刻逼和法蘭克福，士氣都唔差，不過佢哋近3場作客分別對拜仁、多蒙特同萊比錫，全敗共失10球之餘仲全數冇波入，雖然話對手強，但今晚遇上弗爆嘅賀芬咸絕對唔會易踢咗，何況佢哋積分落後太多，想爭歐洲賽席位今晚非勝不可冇得泊大巴，咁就啱晒賀芬咸打反擊嘞！