周二凌晨西甲獨脚戲，貝迪斯將會主場鬥愛斯賓奴。兩隊實力不俗嘅西甲中游班，為爭來季歐霸資格依然要搶分，可惜慢熱嘅貝迪斯有主力防中威廉卡維奴倦勤，呢場開局隨時畀對手反客為主偷到雞，睇好愛斯賓奴搶得第一隊入球。（Now 632周二凌晨3時直播）
近5仗都先開紀錄
講到愛斯賓奴點可以唔提「武球王」武磊，呢位中國前鋒上輪又有波入，以一記凌空墊射打破比賽僵局，搶盡風頭，賽後佢就講出球隊季末嘅目標：「希望可以繼續努力，為球隊爭取參加歐戰嘅資格。」
查實愛斯賓奴近排搶分心切，一開波就撳住對手嚟砌，故此近5仗聯賽都先取得入波，呢場隨時再照辦煮碗。相反，貝迪斯不嬲鍾意搓住嚟踢，球風明顯慢熱，加上葡萄牙防中威廉卡維奴有傷缺陣，冇咗佢等於冇咗中場第一道屏障，後防隨時再有甩漏，靠飄忽走位搵食嘅武磊，肯定再有發揮空間，肯定捧愛斯賓奴第一隊入球。