爭踢歐洲賽同PSG對攻
周三凌晨好波連場，阿King同大家講講過關心水。其中法甲獨腳戲蒙彼利埃將會主場挑戰巴黎聖日耳門（PSG），早前已經成功聯賽捧盃嘅PSG，近期防線甩漏問題十分嚴重，面對仲要爭歐戰資格嘅蒙彼利埃，兩隊隨時上演對攻戰，中位數2.5/3球入球大值得捧場。
（myTV Gold 302、Now 639、有線615及655台周三凌晨1時直播）
樸茅衝升班炸彼德堡
法甲今季冠軍懸念查實早已不存在，PSG大超班再次封王，不過呢支法甲班霸之前喺重返冠軍寶座嘅最後直路，遇上唔少阻滯，皆因後防頻頻犯錯，結果先後輸畀里爾同南特，計埋上場喺法足盃決賽飲恨，入得又失得嘅PSG近5仗全開4球或以上。如今聯賽衞冕之路落下帷幕，今場對PSG而言成為例行公事，反觀聯賽排名第6嘅蒙彼利埃仲有機會爭來屆歐戰資格，今次主場出擊，肯定搏盡，睇好佢哋同PSG鬥入波，捧大盤。
另外，英甲升班爭奪戰亦進入衝刺階段，今輪作客鬥費列活特嘅新特蘭，聯賽餘下兩場嘅情況下，已經好難再爭直接升班資格，今場讓唔起主場頑强嘅費列活特，捧番讓球主勝好過。尾關，主場走勢强勁嘅樸茨茅夫，為爭直接升班席位，今場有望乘勢主場擊敗彼德堡，主勝值博。