今屆歐聯驚喜不斷，熱刺同阿積士能夠喺4強相遇，真係好多球迷估唔到。單純從實力角度，兩隊點睇都難與皇馬、祖雲達斯、曼城等勁旅相提並論，到底佢哋點樣突圍而出呢？
我覺得教練一環不容忽視。先講熱刺，季中不斷有哈利卡尼、迪利阿里等主力受傷，射手孫興民一度為南韓出征亞洲盃而缺陣，但主帥普捷天奴總係淡定有錢剩，佢會因應當時嘅人腳「睇餸食飯」，4231、433、3421及343陣式都畀佢用過晒，按唔同人腳採用不同陣式，多變打法可迷惑對手，甚至臨場會不斷變陣，對於呢位之前只曾執教愛斯賓奴、修咸頓等細球隊嘅主帥嚟講，可謂拿手好戲，因此熱刺嘅成功離唔開「肥普」。
堅持自家青訓出品
阿積士則更加宏觀，佢哋唔夠各大豪門財雄勢大，惟有建基於自家青訓體系，並以傳控足球嘅哲學一代傳一代，縱然經歷挫折，但未曾動搖，終於培育出法蘭基迪莊、馬菲斯迪歷特等好苗子。或者一剎那光輝唔代表永恒，但總好過未威過，1995到96年獲歐聯一冠一亞，而2年前亦在歐霸盃決賽飲恨，證明佢哋唔嘢小，今仗係勢均力敵，但熱刺射手孫興民要停賽，確係讓唔起阿積士。