好多時啲人都話季尾波講鬥志，但睇番上周末又啱啱相反，嗰啲要搶分嘅球隊統統都贏唔到，投注佢哋身上真係喊得一句句。今日阿King揀波都稍為調節一下投注方向，先講場法甲雷恩對摩納哥，後者要搶分護級，今場阿King睇好入球大。
（myTV Gold 302、Now 639、有線655及615台周四凌晨1時直播）
雷恩啱啱同巴黎聖日耳門激戰120分鐘，射贏12碼捧走法國足總盃，取得下屆歐霸盃參賽資格。對佢哋嚟講，今季絕對係超額完成。球隊上下究竟係浸淫喺捧盃嘅歡樂當中，餘下聯賽Hea踢例行公事，定係士氣大振，鼓其餘勇聯賽係咁贏呢？真係好難估計。畢竟球員人望高處，球隊贏咗冠軍自然吸引球探嚟睇波，球員餘下幾場踢得好，隨時水漲船高轉投更佳球隊都唔定。
雷恩難估但摩納哥就唔難估，佢哋依家排聯賽尾4，少踢一場離降班區有3分距離，仍然要為護級努力，今場作客會採取主動，佢哋前線有法卡奧及高路雲等名將，質素始終喺度，要爭取入球唔係難事，不過純粹睇搶分鬥志買客勝，可能會重蹈上周覆轍，不如改變少少策略，轉玩入球大。
串埋真特細費城聯主Ｗ
跟住睇場比利時盃決賽，真特同梅赫倫喺中立場搶盃。論實力真特肯定好過比乙球隊梅赫倫，但梅赫倫既然殺得入決賽，當然唔會咁易就範，幾大同你死過啦，而且真特近況唔係咁掂，近6仗只得1和5負，近2仗更加係入唔到波，梅赫倫頂到唔奇，捧入球細（周三晚8時30分開賽）。最後提供美職費城聯對FC辛辛那提守尾門，新球隊FC辛辛那提攻力欠奉，9場聯賽只入6粒，一班射手仲要適應吓美職嘅節奏，費城聯3連勝狀態火熱，簡單捧主勝。
（周四早上7時30分開賽）