巴塞防線非鐵壁
好多人都認為，今晚歐聯4強首回合巴塞隆拿主場對利物浦，係一場提前咗嘅決賽，我對呢點絕無異議，巴塞曾5度封王，利物浦上屆才殺入決賽，兩軍都具備登上歐洲之巔嘅實力。
造訪魯營球場從來唔係易事，到底利物浦係咪會以守為攻，希望首回合先求唔輸呢？我覺得未必，首先紅軍以穆罕默德沙拿為首嘅前線三叉戟，弗到爆燈，今季從RB萊比錫加盟嘅中場拿比基達，已經逐漸融入球隊，經常後上入楔，猶如第4名前鋒，中堅華基爾雲迪積克不但在防線一柱擎天，亦不時藉死球殺上前助攻有斬獲，我相信其主帥高普不會坐以待斃，深明死守都未必可保住唔輸，倒不如主動爭取作客入球，反而仲有利。另一邊廂，巴塞球王美斯勇達巔峰，入球助攻瓣瓣有，仲有倒戈相向嘅蘇亞雷斯及菲臘比古天奴，攻力之強唔使懷疑，反而佢哋防線唔算頂級，預計係鬥攻格局，入球騷可期。
「蘇B」決策失誤拖累曼聯
順帶講講，近期頻頻甩轆嘅曼聯門神迪基亞，在上仗對車路士再度出醜，對於呢位已充滿離心嘅門將，主帥蘇斯克查不但冇作出應變措施，改用另一門將羅美路，反而出言維護迪基亞。可見曼聯表現大跌Watt，除咗球員表現惡心外，「蘇B」欠缺領軍征戰頂級聯賽經驗，作出一些失誤決策同樣有責。
巴塞鋒強後衞一般，紅軍中前亦具斤両，今晚決戰魯營睇入球騷。