周四凌晨歐聯4強首回合重頭戲，巴塞隆拿主場迎戰利物浦。「地上最強」上場聯賽半力出擊贏波提早封王，相反「紅軍」喺英超跟曼城爭冠鬥得難分難解，冇得輪換下體力較輸蝕；巴塞對上31場歐聯主場豪取28勝3和，有力先拔頭籌開主Ｗ。
（myTV Gold 303、Now 643、有線616及656台周四凌晨3時直播）
巴塞上場以1比0擊敗利雲特後，提早3輪宣布成功衞冕西甲，摒除月底舉行嘅西盃決賽，現階段可專心應付歐聯比賽，爭取成為三冠王。教練華爾維迪吸取上季較少輪換、最終喺歐聯8強被羅馬淘汰嘅教訓，今季明顯更懂得留放，好似美斯、布斯基斯上場聯賽只係打後備；美斯今屆喺歐聯已累積10球，現喺射手榜領先，加上佢之前32次鬥英超球隊個人轟入24球，係歐聯史上攻入英超球隊大門最多次數嘅球員，今次養精蓄銳定必全力爭取士哥，務求為巴塞打響頭炮。
利物浦傷疲作客難頂
利物浦喺各項比賽已經連贏10場，氣勢非同小可，但相比之下，佢哋為爭球會史上首個英超冠軍，聯賽場場都要搏，無論體能上或心態上都比巴塞輸蝕。前鋒羅拔圖法明奴上場聯賽因傷避戰，雖然今場有望復出，但隱約已睇到球隊傷疲問題。再者，紅軍今屆歐聯作客表現絕非突出，5場只得2勝3負，包括分組賽輸畀弱旅貝爾格萊德紅星，要喺魯營全身而退唔容易。
巴塞對上一次歐聯主場輸波已經係12/13球季，當時佢哋喺4強次回合淨吞拜仁慕尼黑3蛋，總比數輸0比7被淘汰，之後巴塞31場歐聯主場錄得28勝3和，贏波率不但高達9成，而且已創下咗歐聯主場最長不敗紀錄，巴塞只要入多1球，便可達到歐聯500球嘅里程碑，首回合主場出擊絕對可睇高一線，主Ｗ值得支持。