歐聯來到4強階段，已冇強弱之分，今晚首回合巴塞隆拿先於主場迎戰利物浦，雖然牌面上巴塞係略勝一籌，但講真大家實力相若，勝負關鍵在於細節。
啱啱蟬聯西甲冠軍嘅巴塞，其隊長美斯今季狀態大勇，單計歐聯已有10球進帳。不過主帥華爾維迪有別於以往「地上最強」教頭，可能吸取上屆歐聯8強首回合主場先贏4比1、但次回合慘吞羅馬3蛋，以致作客入球唔及對手而出局嘅教訓，因此今屆偏重攻守平衡，尤其係踏入歐聯淘汰賽，更加小心謹慎，今屆4場淘汰賽雖然狂轟9球，但僅失1球，可見佢哋其實都會注重防守。
「埃及文明」快如閃電
利物浦嘅「埃及文明」鋒線士哥不斷，除了穆罕默德沙拿重拾射門鞋外，沙迪奧文尼更於近11仗入10球，弗到冇朋友。在主帥高普帶領下，佢哋最擅長打穩守突擊，因為「埃及文明」實在快如閃電，只要一記長傳或靚直線畀佢哋，足以致命。由於巴塞在主場多數會採取主動，反而啱晒紅軍打反擊，預計呢支英超勁旅會先做好防守，睇準機會拮佢一刀，我認為紅軍今仗可搶到作客入球，甚至可全身而退。