周五下午澳職季後賽一觸即發，淘汰圈打頭陣有常規賽「3哥」墨爾本勝利主場鬥第6的威靈頓鳳凰。勝利有本田圭佑同托禾倫壓陣，火力有保證，威靈頓鳳凰亦有常規賽神射手基舒拿喺前場搶「士哥」，雙方都有足夠本錢大演對攻戰，中位數2.5球入球大唔捧肯定走寶！
（myTV Gold 302、Now 639、有線615及655台周五下午5時50分直播）
墨爾本勝利今季獲前瑞典國腳托禾倫同日本中場本田圭佑加盟，雖然冇為球隊帶嚟常規賽冠軍，不過鋒力就獲得顯著提升。勝利今季27仗常規賽狂轟50球，寫下球隊近4季入球數字新高，除咗有一對箭頭巴巴路西斯同托禾倫合共射入27球之外，由杜羅奧斯、安東尼斯同本田圭佑組成嘅中場組合都攜手交出18次助攻，呢場勝利肯定藉主場優勢繼續搶攻。
基舒拿入埋唔夠後面輸
鳳凰27場常規賽射入46球，入球數僅次珀斯光輝同勝利，其中表現最搶鏡嘅非頭號射手基舒拿莫屬，呢位斐濟前鋒常規賽個人獨取18球成為聯賽神射手，鋒力絕對有番咁上下，可惜鳳凰作客表現實在太曳，常規賽最後3仗作客輸晒，包括喺煞科戰畀珀斯光輝以5比0血洗，後防漏洞問題嚴重，計埋嗰場波，佢哋近7仗全開3球或以上，今場為淘汰圈一場決勝負賽事，法定時間打和加時30分鐘，再和則以互射12碼決勝，料鳳凰都會以攻代守，中位數2.5球入球大值博。