英甲煞科玩到盡
今日英甲煞科，阿King同大家一次過睇晒幾個搶分位，包括冠軍、升班附加賽同降班，齊齊睇住個積分榜買波，今輪12場一齊踢，完場就過關收錢。
先講冠軍，盧頓同班士利同獲91分，比第3名嘅樸茨茅夫多4分，雙雙穩奪直接升班資格，當然，如果攞埋冠軍就更加開心。盧頓主場對牛津聯，班士利則會作客布里斯托流浪，牛津聯同布里斯托流浪都冇嘢好爭，照計都唔會阻住人發達，呢兩隻W可以兼顧。
至於3至5位嘅樸茨茅夫、新特蘭同查爾頓個附加賽資格就好穩陣，剩餘一個席位係唐卡士打同彼德堡爭，前者只係領先1分，煞科戰有乜閃失，隨時會畀彼德堡過頭。最後一輪唐卡士打對高雲地利、彼德堡對伯頓，兩軍都係主場出擊，主W應該無甩拖。
下游吼修安聯偷雞成功
至於護級方面就比較混亂，只有排19位嘅AFC溫布頓形勢最好，只要和波就肯定留級。其餘尾五至尾二嘅修安聯、普利茅夫、華素爾同斯肯索普只係相差1分，隨時要去到最後1分鐘先知邊隊安全。修安聯主場對已篤定取得升班附加賽資格嘅新特蘭，主場有機會偷雞成功。至於普利茅夫同斯肯索普要直接對撼，雖然兩隊都要爭取護級，可惜雙方攻力疲弱，轉玩細更佳。