5連勝弗到爆
周六日職重頭戲──北海道札幌岡薩多主場鬥神戶勝利船，暴發戶勝利船易帥後依舊低迷，主將普多斯基唔只辭職拒任隊長，恩尼斯達亦有傷，諸事不順，佢哋想喺「令和年代第一擊」反彈冇咁易，札幌值得睇好。
（有線603及604周六下午1時直播）
勝利船早前雖有西班牙教頭尼路請辭，但成隊波表現依然未見起色，上場聯賽主場以1比2不敵衞冕冠軍川崎前鋒，聯賽累積4連敗，現僅排聯賽榜第12位，狀態陷入谷底。
勝利船內亂4連敗
最大問題係，勝利船內部潛藏暗湧，放低隊長臂章嘅普多斯基，上場波宣稱負傷唔踢，仲自行喺Twitter發布消息，令球會以至聯賽會非常不滿，被罰停操3日反省，然後再公開謝罪。而且新任隊長「小白」恩尼斯達肌肉又有傷，兩日前冇練休息，初瀨亮又要抖成個月，一單好消息都冇，連日本傳媒覺得佢哋今場極之惡踢。
札幌季前雖有上季首席射手都倉賢離隊，不過新加盟嘅巴西外援安達臣盧比斯，同埋土炮射手鈴木武藏皆有上佳演出，2人今季喺聯賽合共轟入10球，加上總計聯賽及盃賽，呢班波已經連贏5場，士氣、信心此消彼長。雖然「跳樓專家」安達臣盧比斯都有些少傷，但係佢哋平均每場進攻創造機會率達13.2%，居日職第1位，每場跑動距離超過117公里，又位列日職第3，主場出擊根本無懼勝利船，讓主[-1]值得睇好。