今晚壓軸戲雲達不來梅主場對多蒙特，主隊排第9位，想踢下屆歐洲賽事必須要贏晒餘下3仗至有價講，客軍落後榜首拜仁兩分，想爭冠同樣要力爭全勝，若然和波等於兩敗俱傷。況且雙方啱啱至經歷完恥辱性慘敗，今場矢志踢爭氣波，預期係對攻格局，推介有2.29倍嘅中位數3.5球大盤。
（on.cc東網周日凌晨零時30分直播）
不來梅上輪作客以1比4慘敗於杜塞爾多夫腳下，但睇表現其實唔太差，只係對手反擊交出超水準，4個入波都靚到絕，輸完呢場不來梅已經落後第7位嘅賀芬咸4分，爭歐霸形勢被動，但先決條件係自己贏晒未來3場先，其實佢哋近期前線火力唔曳，荷蘭中場卡拉臣頻頻有士哥，今晚主場出擊預計會開波就搶攻，不過主力中堅摩辛達停賽，防線不整下預期好難唔失波。
柏高艾卡沙擔正掛帥
多蒙特想保持衝冠希望亦只有贏波一途，今仗仲要陣容不整，守將阿舒拉夫同薩加度養傷、右閘馬里奧斯禾夫同中場大佬馬高列奧斯停賽，防線嚴重缺人，只能寄望剛傷愈嘅比薛斯基可以及時操起狀態頂檔，但前場佢哋人才眾多，今仗馬里奧葛斯將會移後頂替馬高列奧斯，高效射手柏高艾卡沙得以擔正，將轉投車路士嘅美國神童基斯甸佩列錫亦重獲正選，實行上足彈藥同不來梅駁火！