肥賓念舊唔會擋路
英超進入最後2輪比賽，今周可能係利物浦能否趕過曼城首次贏得英超嘅關鍵時刻，事關兩位前紅軍主帥賓尼迪斯、羅渣士帶領嘅球隊，紐卡素及李斯特城分別會鬥紅軍及曼城；今晚紅軍率先登場作客鬥紐卡素，紐卡素已經肯定上岸，加上首席射手艾約斯佩雷斯有傷在身，勢難充當攔路虎，紅軍作客讓1/1.5球照捧上盤。
（Now 621周日凌晨2時45分直播）
曼城今季聯賽只輸過4場波，其中最近一次就係1月底作客輸畀由「肥賓」賓尼迪斯帶領嘅紐卡素，呢位前利物浦主帥早前被問到今場會否刻意「放水」，讓紅軍一圓英超夢，「肥賓」官腔答覆當然話全力以赴，但事實上紐卡素早已宣布護級成功，餘下兩場都係風流波，戰意及決心肯定比唔上1分都不能少嘅紅軍，加上紐卡素上季重返英超後，3次鬥紅軍只得1和2負，實力明顯有距離。由於曼城下周二凌晨先鬥李斯特城，紅軍贏波就可暫時做番一哥，將壓力畀番曼城，紅軍周中喺歐聯4強首回合淨吞巴塞隆拿3蛋，下周中次回合要反勝難度極高，為免「雙失」今場更加不容有失。
紐卡素首席射手上陣成疑
「喜鵲」紐卡素另一不利之處係首席射手艾約斯佩雷斯有傷上陣成疑，呢名有份角逐4月份英超最佳球員嘅前鋒，包辦球隊近3場聯賽5個入波，而且紐卡素今季主場入22球，艾約斯佩雷斯個人佔9球，冇咗佢戰力起碼減半。紅軍方面雖然都有中場拿比基達提早收咧，但三叉戟之一嘅羅拔圖法明奴上場對巴塞已後備上陣，嚟到生死關頭冇得保留，穆罕默德沙拿及沙迪奧文尼亦要爭做神射手，為公為私都要全力爭士哥，紅軍讓一球、球半冇有怕，上盤仍值得睇好。