淘汰圈遇私房菜阿聯
今日下午上演嘅澳職季後賽淘汰圈賽事，常規賽「4哥」阿德萊德聯主場迎戰墨爾本城。阿聯近況睇落雖然唔錯，但鋒力麻麻，而且近年交手畀墨城食住，就算有地利亦靠唔住，墨城有得受讓咁筍，梗係捧讓球客勝。
（myTV Gold 302、Now 639、有線655及615台周日下午5時直播）
阿聯近5場聯賽4勝1和，包括常規賽尾輪以5比3擊敗布里斯班獅吼，但眾所周知獅吼係「黃大仙」，後防有求必應，而且睇番阿聯今季27場常規賽，只係入得37粒，仲少過尾2嘅獅吼，只係比包尾大幡中岸水手多，鋒力唔算銳利。
近7次交手未輸過
墨城最後一輪常規賽主場大勝中岸水手5粒，趁住威靈頓鳳凰淨吞珀斯光輝5蛋，得以憑較佳得失球差趕過鳳凰進佔第5位，成功喺首圈淘汰賽避開同市宿敵墨爾本勝利，明顯行運。
連埋今季在內，墨城已經連續5次出戰季後賽淘汰圈，其中對上4次有3次能夠贏波晉級，應付淘汰圈可謂駕輕就熟。相反阿聯上季以常規賽第5名身份打入季後賽，卻喺淘汰圈首戰輸畀墨爾本勝利早早出局，今次要喺法定時間內贏墨城估計唔易。加上雙方近7次正面交鋒，墨城取得4勝3和未輸過，明顯格食格，仲有得受讓必捧讓球客勝。